Потом князь великии Витовт поехал к Дорогичыну, и князь великии Кестутьи, собравшы силу свою, и со всим своим двором y зброях и вженуть y город y Вилню, и поимаеть князя великого Якгеила и з братею его и з матерю, и тые листы знаидеть y него, што ся з нЂмцы записали, и пошлеть гонца своего к сыну своему, князю великому Витовту, к Дорогичыну, поведаючы ему, иж таковое ся дЂло стало. И тот гонец знаидеть князя великого Витовта y Городне, и князь великии Витовт послышал тое, и за один день прыбежыть з Городна до Вилни до отца своего, князя Кестутья. И речеть Кестутеи сыну своему Витовту: «Ты мнЂ не вЂрыл, сыну, o ce тые листы, што з нЂмцы записался на нас князь великии Якгеило, нижли в том нас бог остерег. A князю великому Якгеилу ничого есмо не вчынили, скарбу есми не рушыл a ни стад, a сам Якгеило y мене в нетстве ходить за малою сторожою, a отчызну его, Витебск и Крево, и вси мЂста, што отец их держал, то все ему отдаю, и ни во што ся не вступую, a то все учынил есми для свое головы, остерегаючы себе в том, послышал есми, што на мене лихо мыслять». И князь великии Якгеило вельми ся урадовал прыезду великого князя Витовъта, и на тых мЂст дасть князь великии Якгеило прысягу князю великому Кестютю и сыну его Витовту на том, што николи не противитися a ни стояти против их, a завжды y их быти по волности y своем дому. И князь великии Кестутеи отпустил его з матерю его и з братею, и со всим его скарбом, и со всими статки, a Воидила обЂсил. И князь великии Якгеило поидеть напервеи до Крева, a князь великии Витовт провадил его до Крэва, a потом c Крева поидеть до Витебска. A князь великии Кестутеи, сЂдшы на Вилни, и пошлеть до Полоцка два паны литовских з воиском. И Полочане, услышавшы тое, урадовалися и крыкнули на рать Скиргаилову, и люди ратные от Скирыгаила отступили и пошли до Вилни до князя великого Кестутя. A князь Скиргаило пошол в НЂмцы y Ифлянты з малым воиском. A князь великии Кеистуть поидеть к Новгородку СЂвЂръскому, a князя Витовта оставить c князем Корыбутом y Литве. A князь великии Якгеило мЂл з Витэбъска c Кеистутем же поити посполу, и в рыхлом часе прысяги свое забыл, и не шол ему на помоч, и намовил панов виленских, жебы засЂли Вилню.
A князь великии Витовт в тот час был y Троцэх, и князь великии Якгеило з Витебъска борздо прыбежыть до Вилни з воиском. И князь великии Витовт пошлеть к Новгородку СЂверъскому ко отцу своему Кестутю. И мистр прускии, услышавшы тую реч, и поидеть на помоч ратью великою князю Якгеилу наборъзде. И то услышавшы князь великии Витовт, иж прусы и нЂмцы до Вилни тягнуть, a князь великии Якгеило з Вилни до Троков идеть воиском великим зниматися з нЂмцы, и князь великии Нитовт ис Троков выбежыть и з матерю своею и поидеть к Городну. A князь великии Якгеило прыступить к Трокам, и трочане подалися ему. И князь великии Кестутеи борздо к Городну прыидеть к сыну своему и тут знаидеть жону свою и пошлеть ее к Берестю, надЂючыся на мазовецкого, зятя своего, князя Януша, a сам князь великии Кестутеи поидеть в Жомоить, а сына своего Витовта оставить в Городне. Тогды князь Януш мазовецкии, забывшы доброе прыязни тьстя своего, князя великого Кестутя, и поидеть воиском к Дорогичыну, и Дорогичын озметь и осадить, и Сараж звоюеть, и Каменец возметь, и подступить под Берестеи. И Берестя не вземшы поидеть проч, и осадить Дорогичын и Мельник. И князь великии Кестутеи, собравшы всю жомоитскую силу и многие люди, и поидеть под Троки, и прыидеть к рецэ Вельи, a князь великии Витовт, собравшы воиско по всеи отчызне своеи, поидеть з Городна на помоч отцу своему, и соимуться воиска на Вельи вышеи Ковна д†мили. Тут воиско Кестутево перевезлися и поидуть к Трокам и оступять Троки. И прыидеть вЂсть ко князю великому Кестутю, што князь великии Якгеило идеть з Вилни з великим воиском, и з ним рать немецкая и ифлянтская. Ино перед тым нЂмцы были на обе стороне непрыятели князю великому Якгеилу, бо перед тым ифлянтская рать ходила на помоч князю Скиргаилу полоцъкому, a потом з мистромъ немецким пруская рать прыходилак Троком, а то вже третии раз ифлянтская рать c ними же прыходила; a тому знаки ест, што з ним заодно стоять против князю Кестутю. И выехал на битву князь великии Кестутеи з сыном своим, князем великим Витовтом, против великого князя Якгеила. И еще ся воиска не сняли межы себе за тры або за чотыры стрельбища, на тых мЂст прыженуть князи и бояре от великого князя Якгеила до князя великого Кестутя и почнуть пытати князя великого Витовта, штобы з ними поговорыли. И почнуть говорыти князю великому Витовту: «Князь великии Якгеило послал нас к тобЂ, штобы еси нас зъеднал со отцэм своим, што быхмо мЂли мы свое, a вы свое, a битвы и кровопролитя жебы не было межи нас, a ты бы прыехал до брата своего князя великого Якгеила, a мы тобЂ прысягу дадим, што тобЂ чысто опять y свое воиско отехати, нехаи бы межы вас добрыи конец стался». И князь великии Витовт отказал, иж «я прысягу вашу y вас беру, але до нас жебы такъже Скиръгаило переехал, a прысягу бы нам дал, a я к вам еду». И они послали до князя Скиргаила, и прыехал князь Скиргаило, и прысягу дал князю Витовту, и князь великии Витовт поехал до князя великого Якгеила к его воиску, a полъки стоять, ничого межы собою не почынають. И князь Якгеило почнеть просити Витовта, рекучы: «Брате милыи, зъеднаи нас, штобы не было кровопролитья». И князь Витовт прысягу узял y князя Якгеила, што отцу его, князю великому Кестутю, з Якгеилом зъехатися и опять чысто розехатися. И еще князь великии Витовт речеть князю Якгеилу: «Пошли, брате, еще ко князю великому Скиргаилу, штобы он дал прысягу князю великому Кестутю, отцу нашему, иж бы ему было прыехати чысто и опят зася отехати, и дал бы нам прысягу от себе». Князь Скиргаило з Витовтом прыидеть ко князю великому Кестутю, и дасть прысягу Скиргаило князю великому Кестутю от князя великого Якгеила и от себе. И князь великии Витовт c князем великим Кестутем, отцом своим, обадва поедуть y воиско Якгеилово, на тые прысяги надЂючыся. И князь Якгеило тые прысяги переступил, и рек так: «Поедьмо до Вилни и там докончаем свое прысяги». И за тым воиска ничого не почынали и оставили. И як до Вилни прыехавшы, там князь великии Якгеило князя великого Кестутья, дядю своего, оковавшы, до Крева послал и всадил y твержу, a князя великого Витовта оставили были y Вилни. И там y Креве князя великого Кестутя удавили пятое ночы коморники князя Якгеиловы, одного звали Прокъшою, што ему воду давал, a другии был Мостев брат a Кучук a Лисица Жебентяи. Так ся конец стал князю великому Кестутю.
По смерти князя великого Кестутя пошлеть князя великого Витовта князь великии Якгеило в нятство до Крева з жоною и велить тверъдо стеречы, a то все помщываючыся Воидила. Князь великии Витовт седЂл y Креве за сторожою y коморе, a жонъкам двема прызволено было ходити до коморы; и княгиню c ним посадили, a положывшы их вон выходять, a сторожа завжды около была. И княгиня великая Витовтовая слышала от людеи, што князь Витовт маеть долго седЂти c нею, и змыслила собе: «Як жонъки будуть нас покладати, тогды тобЂодное жонки плате ускладшы, выити вон з другою жонкою, a тои жонцэ остати бы ся з нею y коморе». И Витовт, послухавшы жоны своее порады, и нарадился y жончыно платье, и вышол вон з другою жонкого, и спустится з города, и втечеть до Немец к мистру до Маранина городка. А сторожи тое видели и не догадалися, довнимали жонка вышла з жонкою. И князю великому Витовту, мешкаючи там y НЂмцох, прыехали там князи многие и бояре литовские, и почнетъ Витовт воевати землю Литовъскую c помочю немецкою. A в тот час князь великии Якгеило и з матерю своею были y Витебъску, a брат его Скиргаило y Троцэх был. И князь великии Витовт повоевал много земли Литовское, a князь великии Якгеило и брат его Скиргаило не могли стояти против великого князя Витовта, бо y Витовта болшая сила была. Тогды князь великии Якгеило перепросил князя великого Витовта и дасть ему Луческ со всею землею Волынскою и c Подольем, a y Литве отчызна его. И князь великии Витовт покору свою учынил перед старшым братом своим Якгеилом и прынял Луческ со всею землею Волынскою и Подолскою.
И потом короля польского Владислава y жывотЂ не стало, a сына жадного не мЂл, толко одну дочку мЂл, на имя Едвигу. И почали поляки часто посылати послы з Кракова ко князю великому Якгеилу, рекучы, жебы прынял крещене старого Рыму a понял в них кролевну Едвигу собЂ жоною и стал бы в них королем y Кракове, на всеи земли Лядскои. И князь великии Якгеило раду собе учынил з матерю своею, княг[и]нею Ульяною, и з братьею своею, и со всими князи и бояры Литовское земли, и поехал до Кракова y Полскую землю. Там же сам крестилъся и братя его, и князи, и бояре, и понял собЂ кролевну Едвигу, и корунован был. И оттоль почала креститися литва y лядъскую вЂру або рымскую, и прыслал арцыбискуп бискупа до Вилни на Литовскую землю, и от тых часов почали костелы ставити по всеи земли Литовскои, Тое ж зимы королю будучы y Кракове со всими князи и бояры литовъскими.