Князь великии Витовт держал княжество Литовское и Руское и иных многих земель. И пребывая в Великом Луцку хотЂл на собя корону взложити, и его неприятеля поляки не допустили ему коруны. Тогда Витовт призвал к себЂ короля полского Якгаила и цысаря римскаго, и великого князя Василья ДмитрЂевича московскаго, зятя своего, и короля угорскаго c королевою, и князь великии тверскии Борис Александрович, и бурмистры прускии и лифлянскии. И от инЂх земель великии послы были: от Иванна, царя царяградцкого, послы приЂхали, и от великого князя рязанского послы, и Одоевские князи сами приЂхали, и были от Великого Новаграда и от Пскова послы, и от ордынских цареи, и еще от волоского воеводы послы были. И жили тЂ всЂ гости y великого князя Витовта седмь недель и выходили c оброку на истраву на всяк день по 500 бочек муки и по 500 баранов, и по 500 вепров, и по 100 зубрев, и по 100 лосеи, и иных вещеи числа нЂт.
Тогда цысар римскии c Витовтом в великои любви был. И там в Лутцку тЂ гости чествовал и даровал различными дарми многоценными. И от того утвердила великая любовь меж ими, иж не мочно исписати o чести и o дарЂх того великаго князя. Которые земли на востоцЂ и на западе, всЂ приходяще кланялися великому князю Витовту. И царь турецкии давал ему великую честь и дары многочестныи часто присылал, и царь цареградскии и тот c ним в великои любви был, також и Чевское королевство и Угорское, и Полское великую честь держали, и еще и и датцкии король великую славу и дары дал славному господарю князю великому Витовту и брату его, королю Якгаилу, держащему стол королевства Полскаго. Тогда славныи господарь Витовт на которую землю гнЂв имЂл и хотел казнити, и корол полскии Якгаило всегда ему помогал и помоч давал. И цари турецкие служили ему, сами своими головами на помоч ему ходили и слушали его. Також и князь великии московскии в великои любви был c ним, и княжата немецкие слушали его и помоч давали на битву, гдЂ ему была потреба. И еще господарь земли Молдавские и воевода волоскии были ему послушни во всем. И князь великии рязанскии, и князи Одоевскии в великом послушест†были, и Великии Новгород и Псков всЂ послушни были. Цари и князи в великои любви были c ним, a иные служили ему и честь великую и дары многие приносили ему не толке по вся лЂта, но и на всяк день. И был князь великии Витовт силныи господарь славен по всЂм землям, и много цареи и князеи служили ему во дворЂ его. A иные, приЂзжаючи, кланялися ему, просяще себЂ царя на царство Ордынское. Первое дал им царя в орду Салтана. И тот Салтан сел на царствЂ, и николи не смЂл противитися силному господарю, и оставив царство Ђхал на ино царствовати мЂсто. И князи ордынские послали послы свои, просячи себЂ иного царя, малого Салтана. И тот малыи Салтан пребывая на царст†не смЂл ослушатися славного господаря, гдЂ коли велЂл ему кочевати, там он и кочевал. И по мале времени тот царь князем ордынским не люб был, и они себЂ просили иного царя, и он дал им царя Довлед-Бердия, и тот Довлед-Бердии на царст†умер, a князь Витовт в то время в Киеве был. И пришли к нему князи ординские в Киев со многими дарми и просили себЂ иного царя, и он дал им царя Махмета. И пожив князь великии Витовт в Киеве, и поЂхал к Луцку Великому, и там ся разболел, и разпустил князеи своих и бояр c великою честию. A корол полскии Якгаило в то время был c князем Витовтом в Лутцку.
ЛЂта 6938-го, a лЂт божие нарожение 1430. Умер князь великии Витофт в Лутцку месяца октября в 23 день. A княжил на Великом княжест†Литовском и Руском 37 лЂт.
«Евреиновская летопись», т. XVII ПСРЛ, 1907 г.